Ua especieria etica, innovanta e itineranta
Segur qu’avetz vist per las carrèras deu país aqueth bus anglés, roi, dab imperiala, qui cor los camins d’Anglet a Pau, qui s’estanca suus mercats de Soston, d’Ortès o de Lescar, qui travèrsa Shalòssa, Bearn e País Basco interior en s’estancant dens los vilatges : n’es pas ua tropa de teatre mes ua botiga !
Se voletz estar un consumidor responsable, mei plan un consum’actor, saber tot çò qui s’escon darrèr la viòca que minjatz o utilizatz tot dia, compréner d’on vien aquera leishiva o aqueth chocolat, que cau har ua visita a Pierre o Antoine qui hèn cada setmana la virada per noste.
Consum locau
En mei s’avetz la nostalgia de las especierias itinerantas, s’ètz estacats au consum locau, e se voletz descobrir tot çò qui’s hè de mélher sus l’itinerari, pan d’un paisan-panissèr […], sabon fabricat a Salias dab òli essenciau deus mei bons… que cau har lo saut e anà’i horucar.
Que descobriratz en baish tot çò qui cau entà plenhar lo tistèth cada setmana, búver un còp e batalar en haut, léger revistas o assajar vestits […], fabricats segon las règlas deu comèrci equitable qui hèn víver vilatges au Senegal.
Transparent
L’originalitat d’aquera entrepresa, frut de l’encontre de tres joens qui vòlen cambiar un chic lo monde dens lo quau e vivem […] qu’es d’aver inventat un mòde d’etiquetatge qui rend transparent çò que crompam […]. Que poderatz comparar las vòstas crompas segon tres critèris de responsabilitat : sociau, environamentau e economic, simbolizats sus l’etiqueta per siloetas verdas, iranjas o rojas. Qu’infòrman sus las practicas sociaus (condemnacion per violacion deu dret deu tribalh per exemple), los quilomètres hèits e los sons seguicis de domaus ecologics, l’abséncia de traçabilitat suus OGMs […].
Consumir autament
Ethiket’bus que s’es prometut de har conéisher d’autes mòdes de consum, de’ns sensibilizar per rapòrt a la nosta responsabilitat o au son abandon quan vam au supermarcat !
Ethiket’bus qu’apartien au hialat MINGA deu comèrci equitable e qu’a creat l’associacion IACA, (Inform’Action des Consom’Acteurs) a finalitat educativa e entà influenciar los proprietaris de las marcas a las quaus e podem aderir.
Ethiket’bus 2, rue Sousbielle 64100 Baiona.
Entà saber quan passan a vòste, que podetz telefonar a Pierre Adam au 06 71 11 03 86, Antoine Poëte au 06 18 99 85 22 o Pierre Marotte entà l’etiquetatge au 06 79 64 01 49
Site internet : www.a-freak-a.com
Informacions sus las enterpresas, en anglés (clicar suu drapèu en haut a dreta entà passar au francés) : www.transnationale.org