Enfin arribèn dens un país sauvatge e negre, dens un país de hautas montanhas, on los gaves tomban de tres mila pès. Aquiu i a pas ni prèstes, ni glèisas, ni cementèris. Aquiu viven los becuts, gigants hauts de sèt canas. Aqueths gigants an pas qu’un uelh, just au bèth miei deu front. Tot lo long deu jorn, guardan lors bueus e lors motons de còrnas d’aur, e tornan miar aqueth bestiar deguens las tutas, lo ser, a bòrd de nueit. Entà hèr bona vita, la carn los i manca pas. Entà disnar, tuan un bueu, entà sopar un moton. Mes hèn pas nat cas de las còrnas d’aur e las getan. Quan gahan un crestian lo hèn còser tot viu sus la grasilha e se l’avalan d’un sol bocin.