Préner dab mans netas
un tròç de cèu de mai au truc de mieidia ;
Torclà’i un ueu de parreta
lusent com un uelh de vetèra ;
Mesclar au tròç de cèu
tres eslamas vriuletas, rojas e dauradas
e aténder la cançon deu cocut.
Mesclar a las eslamas
tres batalhadas e hèsta annau,
un arrisolet de gojata
drin de hum d’auba
e aténder la cançon deu grith.
Mesclar au hum e a l’arríder
e a las tres batalhadas
tres sospirs desbrombats
tres lagremas cadudas
tres sauts de lebraut
ua sarrada de man
ua virada de camin au clar de lua
un pet de sauma descabestrada
ua malícia de perceptor darrèr la caujòla
e aténder la caduda de las duas estelas
sus un quèpi haut apitat
Au lòc deu quèpi, hicar l’ueu de parreta,
au lòc deu perceptor, la beròja gojata,
e aténder que s’arrèste la Tèrra.
Lavetz, desplegar lo tròç de cèu,
bohar sus l’ueu de parreta
e aténder lo shiulet de l’auseron sortit deu cresc
tà que la Tèrra e torni virolejar.
Préner lavetz duas garbas sus la bòrda
e adromí’s dehens dab la canta deu grith
au pregond deu còr.