LO
MAINATGE PRIMENT
1.
Un òmi n’avè pas sonque dus hilhs. Lo mèi joen que dishó au son
pair :
« Qu’es
temps que sii lo menh mèste e qu’agi sòus. Que cau que pusqui me
n’anar e que vedi país. Partatjatz lo vòst ben, e balhatz-me çò
que divi avéder.
– Quiò,
lo menh hilh, ce dishó lo pair ; com vulhis. Qu’ès un
maishant e que seràs punit. »
Puish
aubrint ua tireta, que partatjà lo son ben e que’n hadó duas
parts esgaus.
2.
Chic de jorns arron, lo maishant hilh que se n’anà deu vilatge en
hadent deu gloriós, e shens díser adiu end arrés. Que traucà hòrt
de lanas, de bòscs, d’arribèiras, e que vienó dehens ua gran
vila, on se guastà tots los sòus. Au cap de quauques mes, que’s
caló véner la pelha end ua vielha hemna e se logar pr’estar
vailet : que l’enviàn aus camps entà guardar los asos e los
bueus.
3.
Alavetz, qu’estó hòrt malurós. N’avó pas mèi nat lheit per
dromir la nueit, ni mèi nat huec entà se cauhar quan hadè hred.
Qu’avè a bèths còps tan gran hami que s’auré bien minjat
aqueras huelhas de caulet e aqueras hruitas poiridas dont mínjan los
pòrcs ; mès arrés ne’u balhava p’arrei.
4.
Un desser, lo vente vueit, que’s dishà càder sus un truvèrs,
espiant capvath la frinèsta los auchèths dont volèvan
liugèirament. Puish que vedó paréisher, dehens lo cèu, la lua e
las estelas, e que’s dishó en plorant : Alahòra, la maison
deu menh pair qu’es pleia de vailets dont an pan e vin, ueus e
hromatge, tant com ne’n vòlen. En detant, jo, que’m mòri de
hami ací.
5.
« E ben, que’m vau lhevar, que me n’anirèi trobar lo pair
e que’u dirèi : Que hadoi un pecat, quan ves voloi
dishar. Qu’avoi gran tòrt, e que cau que’m puníssitz, qu’ac
sèi bien. Ne m’apèritz pas mèi lo vòst hilh, tractatz-me com lo
darrèr deus vòst vailets. Qu’estoi copable, mès que’m perivi
luenh de vos. »