MEDISHA

Los vielhs que’s sovienen deu temps on ne calè pas crompar lo drap de lin com uei lo dia, pr’amor que’u teishèn a casa.
Qu’èra peu temps de las hadas ! Tot ser, en s’aplegant tau lheit, la dauna de casa qu’avè l’avisament de hicar un pielòt de lin sus la taula ; qu’alucava un huec bambau a la cheminèia, que deishava la candela avitada a la barbòla, e a l’aubeta, en se lhevant lo matin, lo hiu que’s trobava hielat, e lo dehens escobat dinc a la hornèra.
Temps urós e beròi tribalh, qu’èra lo de las hadas esdeburidas.
Per aqueste temps de fadèr e d’orgulh, las gojatas qu’an espudit lo hus e la filosa. Quant las haré dòu de s’assecar la lenga entà eishalivar lo lin, l’estopa e lo capit ! Que hialan a bèths còps totun shens hus ne filosa, de beròi hiu o de praube coton : segon l’escadença !
Ne s’i parla pas mei tanpòc de téisher lo drap de casa ; lo telèr que drom, la naveta que s’estanca, lo canerèr que s’arronha.
Las hilhòtas que son vadudas aisidas e vagantas. Que las vien miélher de’s ganhar las camisas, dab mei de plaser qu’aquerò, shens hicar en jòc las navetas puntagudas deu telèr, qui traucan la man : qu’ei mei aisit de’s servir deu didau en s’estauviant lo peluson deu canerèr, e mantun còp tanben en s’estirant los braç.
Mès tà reviéner entà las praubas hadas de l’aute còp, qui son mortas, e qui ne van pas reviscolar, que n’i avè ua au miei de la tropa qui èra autan lèda e pendarda, com las autas èran valentas e beròjas. Lo son hiu, grossèr com la gavarra, ne valè pas sonque tà bibalèirs.
Per estar pendarda enqüèra, passa ! Mès qu’avè tanben lo diable a l’espargata. Que demorava tostemps la darrèra tà se’n tornar, e a l’esconut, que getava tot ser quauque bajon, autanplan sus la gent com suu bestiar.
La goja de l’endret, qui s’aperava Medisha, que’s hicà au cap de balhar-la un còp monedas de las soas pèças e de la tornar las peras au sac. Qu’atendó que las bravas hadas qu’estossen partidas per la cheminèia, e quan la maishanta e las voló seguir en se dindolejant com de costuma, que l’enfonsà un cotre hens lo vente.
Autanlèu, crits viahòra !
— Ai ! Ai ! Ai ! Que’m tuan. Que soi juste morta !
— Qu’ei çò qui as ? e la demandàn las autas.
— Que m’an emponchat un pau au cuu !
— E qui ?
— Medisha
— Ò ! E donc tè, Medisha t’ac as hèit ! Medisha t’ac bohis ! 
Que cau tostemps har com vòlen estar hèits.
Cuelhut per Joan V. LALANA