Arreproèrs bearnés (1862)
J. Hatoulet e E. Picot
Ortès, Per Noste 2014, 188 p., 11,5 x 14,5 – Classics gascons n° 11
Ediciona aprestada per Konrad Harrer
Los arreproèrs, qui’s transmeten oraument de generacion en generacion, a còps despuish sègles, que son com la memòria viva d’ua lenga e d’un pòble e que constitueishen doncas ua via tà accedir, de manièra agradiva e sovent umoristica, a la
cultura d’aqueste, a la soa mentalitat, a las soas credenças, aus sons sabers e aus sons usatges.
La reedicion deus arreproèrs amassats per Hatoulet e Picot au sègle XIXau qu’ei estada enterpresa dab la mira de dar au legedor modèrne la possibilitat de har un petit viatge dens lo passat bearnés, e mei generaument gascon, e d’i descobrir faiçons de víver e de pensar d’autes còps.
Entà l’ajudar, l’òbra deus dus autors qu’ei estada transcrivuda en grafia normalizada e los arreproèrs que son acompanhats per comentaris qui, de l’ua part, sajan de’n balhar lo o los sens quan ne son pas mei de bon compréner uei lo dia e, de l’auta part, de muishar que cèrts arreproèrs e s’arretròban, dab variacions o pas, en d’autas lengas e en d’autes país, sii pr’amor l’òmi qu’ei lhèu, fin finala, pertot parièr, sii pr’amor que los arreproèrs eths tanben e viatjan dens l’espaci autant com dens lo temps.